Imigani migufi cyangwa imigenurano

Umunyarwanda yagize ati “Umugani burya ugana akariho”. Iyi mvugo yuje ubuhanga si buri wese washobora kuyisobanukirwa neza.

Tugenekenereje twakumva iyi mvugo isobanura ko umugani uvuga kandi ugashingira gusa ku bibaho mu buzima butandukanye abantu babamo umunsi ku munsi. Ni ukuvuga ko buri gihe umugani ushingira ku mvugo, ibikorwa, imico n’ingeso by’abantu.

Iyo umuntu aciriye undi umugani mugufi hari icyo aba ashaka kumubwira ku buryo bw’amarenga. Ashobora kuwumucira ashaka kumukomeza igihe abona atangiye gucika intege cyangwa akawumucira ashaka kumukebura igihe abona atangiye gutana agakora ibidahwitse.

Kuko imigani migufi ikoresha imvugo yumvwa neza n’abakenetse ururimi, si byiza gukoresha imigani migufi ku muntu uwo ariwe wese utabasha gusobanukirwa neza icyo washakaga kumubwira.

Umugani mugufi ufite ibintu by’ingenzi biwuranga:

1.      Ni interuro ngufi : Umugani mugufi buri gihe uba ugizwe n’amagambo make cyane atarenze interuro imwe ariko agasobanura ibintu bihambaye nk’inyigisho n’impanuro mu buryo bw’amarenga.

 

2.      Ni umvugo yuje ubuhanga : Umugani mugufi ugira igisobanuro kitumvwa na buri muntu wese. Ni imvugo ikunda gukoreshwa n’abamaze gucengerwa n’ururimi rw’ikinyarwanda. Umugani mugufi ukoresha imvugo ishushanya kandi izimiza cyane, ku buryo bitorohera buri wese kumenya icyo ushatse gusobanura. Ibi nibyo bituma imigani migufi bayita « imigenurano ».

 

3.      Ni imvugo igenura, ikosora, ihanura, yigisha, iburira : Ni imvugo igenura kuko ishushanya ubusobanuro, ikaba imvugo ikosora kuko hari imigani migufi igamije kubuza abantu gukora ikibi cyangwa ikidakwiye, ikaba imvugo ihanura kuko imwe mu migani migufi ishushanya ingaruka zakubaho bitewe n’icyo wakoze, ikaba imvugo yigisha kuko inyinshi mu mpanuro abantu baha abandi bakoresha imigani migufi ibigisha kandi ikababurira.

 

4.      Ni imvugo igira igisobanuro shusho ikanagira igisobanuro gishingiye ku
magambo ayigize :  Ibi bivuze ko utamenya neza igisobanuro cy’umugani mugufi mu gihe witaye gusa ku busobanuro busanzwe bw’amagambo awugize.

Kugira ngo rero usobanukirwe neza icyo umugenurano usobanuye, bigusaba kurenga ubusobanuro butangwa gusa n’amagambo agize uwo mugani mugufi hanyuma ukagerageza gushaka igisobanuro shusho.

 

5.      Ni imvugo yuje ikeshamvugo : Umugani w’umugenurano ukoresha imvugo inoze y’ururimi rw’ikinyarwanda. Nta mugani mugufi wasangamo amagambo yakomotse mu zindi ndimi. Buri gihe amagambo agize umugani mugufi aba ari umwimerere w’ikinyarwanda kandi mu mvugo iboneye.

Hashingiwe ku miterere rusange y’imigani migufi, twasanga imigenurano ihimbye mu buryo bubiri bw’ingenzi :

a)      Uburyo bwa kamere : Imigani iciwe mu buryo bwa kamere ikoresha amagambo yoroshye kumva neza bitagoranye. Abana n’abandi batangiye kumenya ururimi rw’ikinyarwanda bashobora kumva no gukoresha neza mu mvugo imigani migufi ihimbye mu buryo kamere.

 

Ingero :

o   Aho ujishe igisabo ntuhatera ibuye

o   Ababiri bajya inama baruta umunani urasana

o   Abajya inama Imana irabasanga

 

b)      Uburyo bw’amarenga : Imigani iciwe mu buryo bw’amarenga itandukanye cyane n’iy’uburyo bwa kamere kuko uyiciriwe asabwa ubuhanga mu kumva, gutekereza no gushishoza cyane kugira ngo asobanukirwe icyo abwirwa.

 

Ingero :

o   Imanga y’Imana iruta ikigarama cy’ijisho

o   Ikiganiro kiraryoha ntikirya irobe

o   Ijambo rya mukuru riturwa ishashi

 

Mu rugamba rukomeye turimo rwo guteza imbere ururimi rw’ikinyarwanda dukoresheje ikoranabuhanga rigera kuri bose na hose, tuzibanda  ku buvanganzo nyarwanda kugira ngo abanyarwanda by’umwihariko urubyiruko rurusheho kuryoherwa n’ubuhanga ndengakamere buhishe mu migani migufi n’izindi ngeri z’ubuvanganzo nyarwanda.

 

Ibikurikira ni imigani y’imigenurano n’ibisobanuro byayo. Ntidushidikanya ko muzabikunda kandi mukadusangiza inyunganizi n’ibitekerezo byanyu mugamije kudutera ingabo mu bitugu muri uru rugendo twatangiye.